انا مش بكااار

موضوع: انا مش بكااار 26/04/09, 05:59 pm

هاااااااااااى يا جماعة انا النهاردة جاايبلكم موضوع منتشر جدا دلوقتى فى جروبات الفيس بوك بتاعة عروسه النيل اللي هى اسوان طبعا "بلدى"
وعايزاكم تقروا ووكل واحد يقول رأيه واذا كنتو فعلا شايفين اسوان بنفس النظره اللي الناس كلها شيفاها بيها

صرخة من أسوانى : أنا مش بكاااار

انا من اسوان.. يعنى ايه؟ يعنى بتركب جمال؟ ولا بتسافر بالمركب؟ ولا بترعى الغنم فى الصحرا؟
لو زهقت من النظرة السطحية الملوخية دى يبقى انت فى مكانك الصح
لو حنقدر نغيـّر راح نغيــّر .. هو ده شعارنا اللى مش هنتنازل عنه
ليه ما نحاولش احنا الاسوانية وكل اللى يقدر يسبح ضد التيار أو يرفض يمشى ورا القطيع اننا ناخد المبادرة ونبتدى نغير الفكرة العقيمة اللى مصر كلها واخداها عن أسوان, وكأنها جزء غريب على مصر!
لازم نحط ايدينا فى ايدين بعض .. ونوصل لكل اعضاء الفيس بوك الوجه الحقيقى لاسوان.. لاننا مش مجرد شوية بكاكير !

كلنا عارفينه..أبو كف رقيق وصغير.. ابن أسوان البار....ومعزته رشيدة.. بنت أسوان (البارة برضه) وأصحابة فارس وحسونة ومشرط اللى دايما شرير ( ماهو اسمه مشرط , هيبقى ايه جراح! ) بكار فعلا فكرة كويسة ممكن تعرفك شوية بست السمار والجمال "أسوان"، فبكار إلى جانب إنه ولد زكى جدا وبيعمل المعجزات.. بيقبض علي الحراميه وبينمي الصحراء , لكن وبرغم تقديري لبكار وللدكتورة منى أبو النصر مبتكرة الشخصية.. أسألك.. هل هذا هو كل ما تعرف عن مدينة أسوان وأهلها؟ّ!!

يعنى ايه اسوان ؟ يعنى السد وابو سمبل وفيله .. لا طب وأهلها .. ناس طيبين وجدعان ( ربنا يكرم أصلك) للاسف معظم المصريين فكرتهم عن الاسوانية ضحلة جدا .. لا تتعدى الاستمبة المعروفة: بوابين الأفلام اللي كلهم اسمهم عثمان، والاسوانية شوية بكاكير (جمع بكار!) بيعيشوا بطريقة بدائية وبيروحوا للسودان بالعَجَل ( على اساس انها اخر الشارع يعنى!) وكل ألاسوانية أسمر من بعض , لكن وللعلم لدينا ومتوافر في أسوان ذوى البشرة البيضاء ! مش اشتغالة والله .. مفاجاة كبيرة..حماقى من فين؟ من أسوان ! بكار ده برضه؟!

عندكم حق ده الصعيد كله مافيهوش منطقة فيها صيت الا اسوان والاقصر , وطبعا النسخة الصعيدية بيعانى منها الاقصراوية والقناوية , عندنا شباب روش بيضرب جيل ويلبس ماركات ويسمع راب كمان، لكن يفضل طول الوقت محتفظ بأصالته وانفراده ومحدش غيره ينفع يلبس الطاقية الأسواني ,مرسوم على وشه هدوء وطيبة وابتسامه منيرية تشرح قلبك رغم الهم , يستطيع سرقة أحسن انطباع منك من أول تعارف .. لكن ؟

أكون فى القاهرة مثلا , وبمجرد قولى انى اسوانى , فأول ما يقوله السائل عفويا: (ياااه , من أسوان) ياعم انا قلتلك جاى من أنجولا! ثم يسأل: (انتو عايشين ازاى فى أسوان؟) وساعتها طفح الكيل بى وأجبت سائلى اجابة لولبية: ( احنا بصراحة حياتنا صعبة , بنعيش فى بيوت كلها من الطين وبنركب جمال , وبنروى الارض بالشادوف ,وبنتاجر بالمقايضة - اصلنا عايشين على الجمع والالتقاط! ) وفوجئت بمحدثى وقد فغر فاه مصدقا الاشتغالة قائلا : (طب جيت ازاى مصر؟) وهنا قلت مخفيا ضحكتى بالكاد: ( احنا عشان عيلة غنية اجرنا جمل , وطلعنا فى القافلة لحد الاقصر فى تلات ايام, وركبنا قطر بيطلع مرة واحدة فى الاسبوع وماشى على خط واحد لغاية ما وصلنا مصر بعد ليلتين بالتمام والكمال !) .

أسال سؤال .. مين السبب ؟ ليه الفكرة دى مش راضية تتعتع من بلدنا ؟ يمكن عشان قناتنا التامنة قديمة حبتين –لأ تلات حبّات- ومصورة اسوان كأنها القاهرة 30 ! ولا عشان محدش اخد باله الا بعد مشروع توشكى ولمّا منير نبهنا لجزء ثرى جدا تراثيا وثقافيا اسمه النوبة , ولغاية ما تتنقل الصورة كاملة .. هتفضل أسوان صاحبة اجمل كورنيش فى مصر , ونيلها الوحيد اللى ليه طلّة وانتعاش يردّوا الروح , والاسوانية أجدع ناس , ومش كل أسمر أسوانى , ولن أعيش فى جلباب بكار

موضوع: رد: انا مش بكااار 26/04/09, 08:29 pm

طمطوم بجد بشكرك على الموضوع الاكتر من رائع واللى بجد

يستحق النقاش الطبيعى ان اى حد فى كل العالم المتقدم زى

اوربا باكملها واخدين الفكرة اللى انتى بتتكلمى عليها دى عن

مصر ويمكن دة شوفناة فى اكتر من فيلم اجنبى دة بيرجع

بجهل القاهرين ببلدكم لانهم مزاروهاش قبل كدة بس صدقينى

مش لدرجة الجمال والحاجات اللى انتى اتكلمتى عنها

والمشكلة ان لازم كل حد زار بلدكم يتكلم عن جمالها يمكن انا

مزورتهاش بس اتحاكالى كتير عنها انا متهيالى ان بلدكم دى

اجمل بلد فى مصر دة كفاية سحرها اللى شوفتة كتير اوى

فى بعض افلام عارفة انى بتمنى ازورها اوى واللهى لانى من

وجهة نظرى انها اجمل كتير من بلاد كتير ملهاش لا لون ولا روح

اما بلدكم متهيالى فيها اجمل روح ممكن تلاقيها فى بلد مصرية

والمفروض ان اى حد زيك منها يحاول يوصل شكل البلد لكل

حد يعرفة زى ما انتى قولتى دلوقتى فى منتدانا علشان

الفكرة تتصلح واللى ميعرفش اسوان انتوا ممكن تعرفوهاله دة

يمكن لما يعرفوها تلاقى هجرة جماعية من سكان القاهرة

واسكندرية بلدى لعندكم اة واللهى متزعليش خالص من اى

حد ممكن يكون واخد فكرة غلط عن بلدكم وقوليلهم انتوا

شوفتوها اكيد الرد هيكون لاة قوليلهم طب اتكتموا باة وروحوا

زوروها بجد موضوعك لذيذ اوى يا طمطومتى ويستحق النقاش

وحمدالة على سلامتك يا جميلة وعلى فكرة انا بموت فى بكار

ومنير وكمان حماقى

تقبلى مرورى

لؤلؤة

موضوع: رد: انا مش بكااار 27/04/09, 02:08 am

أولا انا بشكرك خالص على اهتمامك
وبجد انا مش عارفة اقولكم اد ايه اسوان دى بلد جميله
انا عن نفسي رحت بلاد كتيره ولفيت المثلث الارضى قاره قاره وملقتش زي اسوان
هو طبعا اي حد بيشكر فى بلده عشان بس هى بلدة بس مش انا لوحدى
اي حد بيجي اسوان مش بيبقى عايز يسبها_زى ما قال الدكتور العظيم دة معرفش مين " وكل عام وقت المرواح بتبقى مش عايزة تروح وتسيب بلدنا "
يعنى كفايه الهدوء اللي عندنا والناس الطيبين والمواصلات الكويسه والناس بتحب بعض وتمشي فى الشارع تحس انك عارف الناس كلها ولا نيلها اللى مافيش اي كلام يوصفو احسن من اغنيه منير

بس بلاش والنبي حكايه الهجره الجماعيه دى احنا مش ناقصين زحمه احنا كدة حلوين

وعلى فكره الموضوع دة يا سكيتر فكرنى بموضوعك عن الصعايدة وعن الاضطهاد اللى بيتعرضولو اهو انا دلوقتى فى نفس المكان
يللاياريت تقراه وتقول رايك بئه

موضوع: رد: انا مش بكااار 27/04/09, 09:11 pm

طمطم ...موضوع جميل جدا وبجد حاجة جميلة جدا انك تحاولي وتبداي تصححي فكر البشر عن اسوان والصورة اللي واخدينها عنهم
طمطم ..اسوان بجد بلد في غاية الجمال ..كفاية اووووي ان الاجانب بيجيوا من بلادهم مخصوص علشان يتصوروا جمب تمثال او يشوف السد العالي ....كل ده لانها بتتمتع بحاجات كتير
واسوان بجد بلد جميلة كفاية السد ...وكفاية ابو سمبل ..وكفاية وكفاية ...لو قعدت للصبح مش هاقدر اوفيلها حقها بجد
واحب اقولك يمكن الكلام اللي بيطلع ع ان اسوان دي بلد بكار ورشيدة ...او بلد عمك عثمان البواب ...ده مش تقصير منها ..لاكن الاتهام بيتوجه لوسائل الاعلام انها مش عاطيها اسوان حقها في تقديرها وكده ..اسوان ناسها بجد طيبين اووووي ...ويمكن هي مظلومة علشان انها بعيدة اووووي ....فهي مش واخدها حقا زي البلاد التانية ... واحب اقولك بردو ان مش اسوان بس اللي فيها تلاقي الناس السمر ...لا كل محافظات مصر تلاقي فيها .لاكن سبب زيادتهم في اسوان ..علشان حرارة الشمس ...ومش كل ناسها سمر ....او كل ناسها مش متفاهمين ..وكفاية اووووي انك اثبتي للبشر ان اسوان بلد مش بتفرق عن اي بلد اخري وفي اي حاجة
اسف ع الاطالة
يسلموا ايديكي ع المجهود الرائع
تقبلي خالص تحيتي ...للبشر جميعهم الموجودين باسوان

موضوع: رد: انا مش بكااار 28/04/09, 10:28 am

نورت التوبيك يا كابو ومرسي على تعبك
بس ياريت كل الناس زيك بيبصو لاسوان النظره دى
واه هى فعلا مظلومه لانها بعيدة دة في ناس كتير معتقدين ان اسوان او خاصه بلاد النوبه جزء من السودان وملهاش علاقة بمصر
وبعدين حكايه الناس السمر دى زى ما بتقول مش كتير دة بس فئه قليله خالص والباقى يعنى ناس عاديه وبتمشي على ايدين ورجلين وحتى السمر يعنى دة انا بشوف فى اسكندريه مناطق الناس فيها السمر كتييييييييييير اوى اكتر من عندنا

موضوع: رد: انا مش بكااار 29/04/09, 06:08 pm

طمطم

توبيك اكتر روعة وعجبنى اوى
ويمكن زى ماقلتى فى ردك ان فعلا ده زى توبيك الصعايدة وصلوا
ونفس السيناريو اللى بيتكرر مع اى بلد مختلف عن الاغلبية المصرية الحاكمة
اللى بتتكلم بإيه وبقى ومعلش وسورى .. واللى شايفة باقى الناس متخلفة
او كل حياتهم غريبة وشايفة باقى المصريين هما بدو ولبسهم الاساسى جلابية وعمة ..!!
سيناريو .. فكرة اسوان زى اى بلد صعيد مظلوم متاخد عنه فكرة غلط
فى كل حاجة فى عاداته ولبسه وتقاليده
انا مش محتاج حد يقولى اسوان جميلة كد إيه لانى متامد من ده
وعلى فكرة كل بلد صعيدة بتكون ليها حاجة او سمة بتميزها
غير محافظات بحرى يمكن كلها شبه بعضها
سيناريو الفكرة الغلط اللى بقولك عليه ده يا طمطم
طبعا الاعلام ليه نصيب الاسد فى التشهير والكلام عنه
زى ماانتى ذكرتى الافلام وفكرة بكار وحتى المسلسلات .. وطبعا الحالة الاجتماعية والمادية للصعايدة عموما
.. باشكرك ع التوبيك المتميز .. وعجبنى اوى انك فكرتى فعلا تغيرى من نظرة بلدك سواء ع الفيس بوك او غيره .
وياريت كلنا يعمل كده لبلده ويعرف كل اللى حواليه بلد هيه ميين ..!!
باشكرك اوى وتسلمى الايادى وتوبيك اكتر من روعة .. واكيد ليكى احلى تقييم

تسلمى الايدى يا طمطم .. وآسف ع الاطالة .. تحيتى