الانتيم Alanteem
مرحبا بك عزيزي الزائر/عزيزتى الزائرة . المرجوا منك أن تعرّف بنفسك و تدخل المنتدى معنا. إن لم يكن لديك حساب بعد, نتشرف بدعوتك للتتسجيل معنا وتكن ضمن اسرة منتديات انتيمك
شكرا وردة
إدارة المنتدى

الانتيم Alanteem

User-Agent: *
 
الرئيسيةAntemk.net عالمس .و .جبحـثالتسجيلدخولمكتبة الصور

شاطر | 
 

 رب صدفة خير من كيس جوافة

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
tumtum
انتيم من الآخر
انتيم من الآخر


تاريخ التسجيل : 10/07/2008
المساهمات : 537
نقاط : 3179
التقييم : 7
الإحالة : سكيتر
العمل : عمل ربنا
عنوانك : Aswan ...the bride of the nile

بطاقة الشخصية
الوطن: انتيمك انتيمك
sms المنتدى sms المنتدى:

مُساهمةموضوع: رب صدفة خير من الف جوافة   18/07/08, 01:34 am


فى موسم الجوافة اللى فات
كان يوم سبت
وماما كان عندها جوافة
كلتلى انا كام جوافياية
ونزلت اشترى شوية حاجات
من سيتى مول اللى فى اخر الهرم
وانا عمالة ابص على الفترينات
اكتشفت ان فيه بذرة جوافياية
اتحشرت بين اسنانى حاولت اطلعها بلسانى
ونتج عن محاولاتى ان بؤي اتفتح على مصراعيه
ولما بؤى اتفتح على البحرى
خدودى طلعت لفوق شوية فضغطت على عنيا
النتيجة ان اللى يشوفنى يفتكرنى بضحكله
وانا مبضحكش لحد
انا كل الحكاية انى بحاول
اسلك البذرة اللى اتحشرت بين اسنانى

المهم فى محاولاتى البائسة
لقيت واحدة بتجرى من بعييييييد وجاية ناحيتى وبتقول
مش معقووووووووووووووووول
ريتشااااااااااااااااااااااارد
وبتبص ناحيتى
انا افتكرت ان فيه حد ورايا والبت دى بتندهله
لفيت راسى نوع من انواع حب الفضول
علشان اعرف مين ريتشارد ده
لما بصيت ورايا مالقيتش حد
رجعت راسى تانى
كانت البت دى واقفة قدامى
لدرجة ان راسى كانت هتخبط فى راسها
واذ فجأتن
الاقيها واخدانى بالحضن اوى
وهاريانى بوس
وانا فى عقل بالى بقول
مين دى؟

البت: وحشانى يا ريتشارد
انا مذبهلة وصامتة صمت ابو الهول
ولسانى عمال يلعب فى البذرة اللى مش عايزة تطلع
البت: اخبارك ايه يا نورا
انا فى عقل بالى: مين دى؟
انا بصوت مسموع : الحمد الله
انا فى عقل بالى تانى: ريتشارد مين؟
البت: ها اتجوزتى ولا لسه؟
انا فى عقل بالى: مين دى؟
انا بصوت مسموع: اه اتجوزت
البت : اتجوزتى خالد؟
انا فى عقل بالى: هى البت دى تعرف خالد منين؟
انا بصوت مسموع: لا اتجوزت هانى
البت: هانى مين؟
انا فى عقل بالى: مين دى؟
انا بصوت مسموع: كان معايا فى الجامعة
البت: معقول متجوزتيش خالد
ده انتى يا بنتى كنتى بتخافى تقلعى الدبلة تفرجيهالنا
كنت بتقولى ده فال وحش
انا فى عقل بالى: مين البت دى؟
انا بصوت مسموع:كل شئ قسمة ونصيب
البت : ومين اللى فسخ الخطوبة؟
انا: خطوبة ايه؟
البت:خطوبتك انتى وخالد
انا: دى حاجة عدى عليها زمن
وزى ماقلتلك كل شئ قسمة ونصيب
انا فى عقل بالى: مين البت دى؟
البت: بس ياااااه يا ريتشارد ده انتى ليكى وحشة جامدة اوى
انا فى عقل بالى: ريتشارد مين
هى البت دى هبلة ولا ايه؟
انا بصوت مسموع: ريتشارد مين؟
البت: انتى نسيتى ولا ايه؟
انا:نسيت ايه؟
البت: انت ناسية ان احنا كنا ملقبينك فى المدرسة بــــإسم
ريتشارد قلب الاسد
انا بحاول افتكر: ياااااااااااااااااه ايوة صح
انا نسيت خالص الموضوع ده
انا فى عقل بالى: مين البت دى اللى تعرفنى وانا معرفهاش
البت: بتشوفى حد من الشلة؟
انا: شلة مين؟
البت: مروة وامانى والناس دى
انا: اه بشوفهم كل فين وفين
انا فى عقل بالى: يارب البت دى
تقولى ابقى قوليلهم فلانة بتسلم عليكم
علشان اعرف اسمها
البت: ابقى سلميلى عليهم كتيير
انا هتشل لوحدى
انا: ان شاء الله
البت: بقالك اد ايه متجوزة يا نورا؟
انا: حوالى خمس سنين
البت: معلش
انا مستغربة: معلش ايه؟
البت: يعنى متزعليش نفسك
انا مستغربة وبدأت ادى وش اباحة: مزعلش نفسى على ايه؟
البت: انا كان ليا واحدة صاحبتىقعدت سبع سنين وبعد كدة ربنا كرمها
انا خلاص اديت وش الاباحة: نعمممممممممممممممم؟
البت: قصدى يعنى ان ربنا رزقها بالعيال
انا مبرقة عنيا
و وش الاباحة بقى على اخره: طب وده ايه علاقته بيا؟
البت: انا قصدى اقول يعنى ان ربنا ان شاء الله
هيرزقك بالعيال برضه
واوعى تفتكرى ان خمس سنين دول حاجة كتير
ربنا كرمه واسع
انا تقريبا اتشليت خلاص: وهو حد قالك ان ربنا مرزقنيش بالعيال
انا الحمد الله معايا شريف داخل على اربع سنين دلوقتى
البت مفزوعة: ايه؟ انتى مخلفة؟
انتى مخلفة؟
انتى عندك عيال؟
بجد انتى عندك عيال؟
لا لا لا لا
انتى اكيد بتهرجى
انتى عندك عيال
بقى انتى عندك عيال
انا: ايه فيه ايه يا بنتى ايوة الحمد الله عندى ابنى
فيه ايه
ايه الغاغة اللى انتى عملاها دى؟
البت: لا مش معقول
اصل مش باين عليكى خالص انك حملتى وخلفتى
ده انا اول ما شوفتك افتكرتك لسة متجوزتيش
انا فى عقل بالى: الله اكبر خمسة وخميسة
انا بصوت مسموع : لا بس انا تخنت برضه
البت: تخنتى ايه بس يا نورا
انا اللى ضربت خالص بعد الجواز والخلفة مش كدة؟
انا فى عقل بالى: ما هو انا لو اعرف انتى مين اساسا
كنت يمكن عرفت اذا كنتى ضربتى فعلا ولا لأ
انا بصوت مسموع: مش اوى
البت: اصل انا كمان اتجوزت وعندى عمر وحبيبة
انا: ربنا يخليهوملك
البت: بس انا ماكنتش متخيلة انك هتعرفينى؟
انا فى عقل بالى: احييييييييييييييييييه
ومين قالك انى عارفاكى؟
انا بصوت مسموع: لأ ازاى هو انا معقول معرفكيش
البت: انا اصلى شايفاكى من فترة هنا فى المول
وكنت عايزة اجى اسلم عليكى وخفت تكونى نسيانى
بس لما لاقيتك بتبصيلى وبتبتسمى اوى عرفت انك فكرانى
انا فى عقل بالى: مين دى؟
البت: المهم يا ريتشارد معاكى موبايل ؟
انا: اه
البت: طب خدى سجلى نمرتى عندك
وملتنى رقمها
انا بتخابث عليها: تحبى اسجله باسمك ولا باسم ام عمر
البت: خليها ام عمر
انا فى عقل بالى: احيييييييييييييييييييييييه
يا بتى انطقى قولى اسمك
خلينى اتنيل افتكرك فى اليوم اللى مش فايت ده
البت: انا مبسوطة اوى انى شفتك النهاردة يا نورا
ومتتصوريش انا فرحانة اد ايه انك فاكرانى
انا فى عقل بالى: مين دى ؟
البت: بوسيلى ابنك كتير وخلينا نشوفك
معاكى تليفونى اهه يعنى مالكيش حجة
انا:اكيد طبعا
البت مشيت
انا فى عقل بالى: ميييييييييييييييييين دىىىىىىىى؟

وكل الكلام اللى فوق ده
نطلع منه بحاجة واحدة بس
اللى ياكل جوافة بعد كدة
يبقى يغسل سنانه قبل ما يخرج


منقول
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
سها محمد
مشرفة بنات انتيمك
مشرفة بنات انتيمك


تاريخ التسجيل : 25/05/2008
المساهمات : 1894
نقاط : 3066
التقييم : 1
الإحالة : جنه الفردو
العمل : أطفالى خالص
عنوانك : فوق كوكب

بطاقة الشخصية
الوطن: انتيمك انتيمك
sms المنتدى sms المنتدى:

مُساهمةموضوع: رد: رب صدفة خير من كيس جوافة   26/07/08, 01:59 pm

حلوة

النظافة من الايمان
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
رب صدفة خير من كيس جوافة
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
الانتيم Alanteem :: 

@ انتيمك الترفيهى @ :: إستراحة انتيمك

-
انتقل الى: